නීරෝගීමත් වීමට සිරුරේ බර වැඩි කරගනිමු

ඔබගේ සිරුරේ බර අඩු නම්, එයට හේතුව ඔබ දැනගතයුතුයි. ඒ ඔබගේ ජීවන රටාව ( සමබර ආහාර වේලක් නොගැනීම හෝ අධික ලෙස ව්‍යායාම කිරීම), ඔබගේ රැකියාව ,ජානමය සාධක , මානසික හේතුන් හෝ ඇතැම් විට වෛද්‍යමය හේතුවක් නිසා විය හැක. සිහින් බර අඩු සිරුරක් තිබීම සෞඛ්‍ය සදහා හිතකර බව ඇතැමුන් සිතුවද, අඩු පෝෂණ තත්වයන් රක්තහීනතාව, ඔස්ටියෝපොරෝසිස් වැනි රෝග වලට හේතුවක් විය හැක. ඔබගේ සිරුරේ බර අඩුවීම ඔබගේ ජීවන රටාව නිසා සිදුවෙනවා නම් ඔබට පහත සදහන් ක‍්‍රමය අනුගමනය කල හැක.

සෞඛ්‍ය සම්පන්න ආහාර වේලක් ගැනීම සහ නිතිපතා ව්‍යායාම කිරීමෙන් ඔබේ ශරීර බර සෞඛ්‍ය සම්පන්න පරාසයක් තුළ පවත්වා ගැනිමට ඔබට හැකිවෙයි. මාංශපේශි වර්ධනය කරගැනීමෙන් ඔබගේ බර වැඩි කරගැනීමට හැක. මාංශපේශි ශක්තිමත් කරගැනීමේ ව්‍යායාම මගින් මාංශපේශි වර්ධනය කර ඔබගේ බර වැඩි කරගැනීමට උපකාරීවේ. මෙම ව්‍යායාම සතියකට දෙතුන් වතාවක් කළ යුතුය. ව්‍යායාම වලදී සිදුවිය හැකි අනතුරු වලක්වා ගැනීමට විශේෂයෙන්ම ඔබ දැනුවත්ව සිටීම වැදගත් වේ. භෞතචිකිත්සකවරයෙකු අධීක්ෂණය යටතේ නිසි ලෙස සැලසුම් කරන ලද ව්‍යායාමයන් මගින් ඔබගේ අරමුණ කරා ලගා වියහැක.

ඔබගේ බර වැඩිකර ගැනීමට ව්‍යායාම කිරීම පමණක් ප්‍රමානවත් නොවේ. ඔබගේ ජීවන රටාව ඇතැම්විට ඔබගේ සෞඛ්‍යයට අහිතකර ලෙස බලපෑම් එල්ල කළ හැකිය. ඔබ අධික ලෙස මහන්සි වී වැඩ කරන අයෙක් විය හැකිය. නැතහොත් ඔබ නොනිදා වැඩ කටයුතුවල නිරත වන අයෙකු විය හැකිය. එබැවින් ඔබ නිසි කාලසටහනකට අනුව කටයුතු කලමනාකාරණය කරගැනීම වැදගත් වේ. නියමිත වේලාවට ආහාර ගැනීමට මතක තබාගන්න. ඔබගේ ආහාර වේල අතපසු නොකරන්න. තවද ඔබගේ මනස සැහැල්ලුවෙන් තබාගැනීමට වගබලාගන්න. මානසික ආතතිය ඔබගේ සෞඛ්‍යයට අහිතකර ලෙස බලපෑම් එල්ල කළ හැකි බැවින් ඉන් මිදීමට කටයුතු කිරීමද ඔබගේ සෞඛ්‍ය නිසි ලෙස පවත්වා ගැනීමට වැදගත් වේ.

නමුත් බර අඩුවීම කිසියම් රෝග තත්වයක් නිසා සිදුවෙනවා නම් ඔබ වෛද්‍ය උපදෙස් ලබා ගන්න.

සිරුරේ බර වැඩි කරගැනීමට පහත ව්‍යායාමවල නිරත විය හැකිය

Push up

• මෙම අභ්‍යාසය සරල වන අතර ඔබේ අත් සහ උරහිස්වල මාංශ පේශි ගොඩනැගීමට උපකාරී වේ.

Pull up

• මෙම අභ්‍යාසය කිරීමට ඔබට යම් ආකාරයක pull up දණ්ඩක් හෝ ශක්තිමත් සිලින්ඩරාකාර වස්තුවක් අවශ්‍ය වේ. මෙම ව්‍යායාම අත සහ උරහිස් මාංශ පේශි ශක්තිමත් කිරීමට සරල ක්‍රමයකි.

Squats

• මෙම ව්‍යායාම ඔබේ පසුපස සහ කකුල් වල මාංශ පේශි ගොඩනැගීමට උපකාරී වේ.

Walking lunges

• මෙම ව්‍යායාමය ඉඩ ඇති ඕනෑම ස්ථානයක සිදු කළහැක. එය ඔබගේ පාදවල හා පිටුපස මාංශපේශි වර්ධනය සදහා වැදගත්වෙයි.

Crunches

• Crunches ඔබේ ඇතැම් උදරීය මාංශ පේශි සදහා වැදගත්වෙයි.

Bench Press

• මෙම ව්‍යායාමය මගින් උරහිස්, triceps සහ පපුවේ මාංශ පේශි විශාල කරගැනීමට උපකාරී වේ. ඔබට වැඩි බරක් තැබිය හැකි තරමට මාංශ පේශි වැඩි වේ. ආරක්ෂාව සඳහා වෙනත් පුද්ගලයෙකුගේ උපකාරයෙන් ඔබට මෙම අභ්‍යාසය සිදු කිරීමට වගබලා ගන්න.

Bench dips

• Triceps සහ උරහිස්වල මාංශ පේශි වර්ධනය කිරීමට Bench dips උපකාරී වේ.

ඔබගේ ප‍්‍රගතිය සටහන් කරන්න

සෞඛ්‍ය සම්පන්න ලෙස බර වැඩි කරගැනීමට වැඩි කාලයක් ගතවෙයි. එය පුද්ගලයාගෙන් පුද්ගලයාට වෙනස් වෙයි. මන්දගාමී ක‍්‍රියාවලිය පිළිබදව ඔබ කලකිරීමට පත් වියහැක. එබැවින් ඔබගේ ප‍්‍රගතිය සටහන් කිරීම දිරිගැන්වීමක් විය හැක. ඔබට ඔබගේ බර සතිපතා හෝ මාස්පතා මැන ප‍්‍රගතිය සටහන් කරගත හැක.

මෙම තොරතුරු සාමාන්‍යය දැනුම සදහා වන අතර එය ලබා දී ඇත්තේ අධ්‍යාපනික කටයුතු සඳහා පමණි. මාංශපේශි ශක්තිමත් කිරීමේ ව්‍යායාම වර්ග බොහොමයක් ඇති අතර ඔබට වඩාත් සුදුසු ව්‍යායාම මොනවාද, ඔබට අවශ්‍ය තීව්‍රතාවය, ඔබ කළ යුතු ව්‍යායාම ගණන සහ ඔබ කල යුතු කාලය සොයා ගැනීමට ඔබේ භෞතචිකිත්සකවරයාගෙන් උපදෙස් ලබා ගන්න.

ජනනි ලියනගේ

සමුද්‍යා අමරසේකර